НИТХ-ын сонгуулийн 8-р тойрогт нэр дэвшигч О.Зундуйдорж, Б.Онон, Д.Батсайхан, А.Ядамсүрэн, Л.Отгонбаатар, Б.Билэгт, ХУД-ийн ИТХ-ын 6-р тойрогт нэр дэвшигч С.Түвшинжаргал, Ж.Бямбасүрэн, Б.Арсланбаатар, М.Энхсанаа, Л.Оюунбилэг нар өнгөрөгч амралтын өдрөөр (2024.10.06) ХУД-ийн 11, 17, 18, 22-р хороодын оршин суугч, сонгогчидтой уулзаж, мөрийн хөтөлбөрөө танилцуулан тулгарч буй орон нутгийн асуудал, бэрхшээлийг сонсож, санал бодлоо солилцлоо.
Тус уулзалтад УИХ-ын гишүүн, УИХ дахь АН-ын бүлгийн дарга О.Цогтгэрэл оролцов. Уулзалтын үеэр ХУД-ийн ИТХ-ын 6-р тойрогт нэр дэвшигчдийн зүгээс УИХ дахь АН-ын бүлэгт “Үндэсний цэцэрлэгт” хүрээлэнд 960 хүүхдийн сургууль, 250 ортой цэцэрлэгийн хоёр цогцолбор, ХУД-ийн 11-р хорооны нутаг дэвсгэрт ижил стандартаар баригдах сургууль, цэцэрлэгийн нэг цогцолборын зураг төслийн төсвийг 2025 оны улсын төсөвт, тэдгээрийн барилгын ажлын төсвийг 2026 оны төсөвт тусгуулахад онцгой анхаарч, хамтран ажиллах хүсэлтийг гардууллаа.
АН-ын бүлгийн дарга О.Цогтгэрэл Хан-Уул дүүрэгт улсын сургууль, цэцэрлэгийн хүртээмжгүйгээс шалтгаалан энэ хороодын оршин суугчид хүүхдээ өндөр төлбөртэй хувийн сургуульд өгөхөөс өөр аргагүй болж байгаа нь гэр бүлийн санхүүд ч мөн хүндрэл учруулж байгааг онцлов. Мөн нэр дэвшигчдийн хүсэлтийг АН-ын бүлэг холбогдох байгууллагуудад уламжилж, боловсрол, нийгмийн дэд бүтцийн асуудлыг шийдвэрлэхээр зорьсон энэхүү санаачилгыг хуулийн хүрээнд дэмжин ажиллахаа илэрхийллээ.
