Ардчилсан намын зөвлөлөөс өргөн барьсан 5 багц 38 саналтай тогтоолын төслийг УИХ-ын дарга Г.Занданшатар хүлээн авсангүй

2020-04-03

    Улсын Их Хурал дахь Ардчилсан намын зөвлөлийн гишүүдээс "Короновирусын гамшиг болон түүнээс үүдэлтэй эдийн засгийн хүндрэлийг даван туулах онцгой арга хэмжээний тухай" 5 багц 38 саналтай тогтоолын төслийг нэн яаралтай Улсын Их Хурлаар хэлэлцүүлэхээр УИХ-ын даргад өргөн барьсан боловч хүлээн авсангүй.

Өнгөрсөн даваа гаригт УИХ дахь Ардчилсан намын зөвлөл, АН-ын үндэсний бодлогын зөвлөлийн гишүүд, МҮХАҮТ-ийн удирдлагууд болон бизнес эрхлэгчид өргөтгөсөн цахим хуралдаан зохион байгуулж, хурлаас гарсан саналаа нэгтгэн, тооцоо судалгаан дээр үндэслэн, тогтоолын төсөл өргөн барина гэдгээ мэдээллэж байсан. Гэвч тогтоолын төслийг хүлээж аваагүй байна. Энэ талаар өнөөдөр /2020-04-03/ Ардчилсан намын зөвлөлөөс сэтгүүлчдэд мэдээлэл хийлээ.

Мэдээлэлд

    “Короновирусын гамшигтай тэмцэх төрийн бодлогын хэмжээнд асуудлыг шийдвэрлэж, үүнээс үүдэж гарах эдийн засгийн эрсдлээс хамгаалах бодлогоо гарган, хэрэгжилтийг хангах төлөвлөгөөг боловсруулж, төлөвлөгөөний дагуу хийгдэх эрх зүйн орчны өөрчлөлтийн хуулийн жагсаалтыг гаргая гэсэн нийт дөрвөн зүйлийг хөндсөн. Энэ бодлогын бичиг баримтаа бэлэн болгож, Ардчилсан намын зөвлөлийн бүх гишүүд УИХ-д тогтоолын төслийг өргөн барих гэж цаг тогтсон боловч, УИХ-ын тамгын газар, УИХ-ын дарга энэ тогтоолын төслийг хүлээс авахаас татгалзсан. Үүний улмаас бид сэтгүүлчдэд зарласан байсан Хэвлэлийг бага хурлаа хүртэл цуцлахад хүрсэн билээ. Харин манай тогтоолын төслийг хүлээж аваагүй татгалцсаныхаа дараа коронавирусийн эсрэг ажиллах Засгийн газрын ажлын төлөвлөгөөг их хурал хүлээн авсан байна.

Тиймээс өнөөдөр бид олон нийтэд мэдээлсний дараа дахин өргөн барих хүсэлтийг УИХ даргад тавих болно. Хэрэв энэ хүсэлтийг хүлээн авахгүй бол яг энэ бодолгын шинжтэй, хэрэгжилтийн төлөвлөгөөнд заагдсан зүйл заалтуудыг УИХ-д, Байнгын хороонд хөндлөнгийн санал болгож оруулах нь зүйтэй гэж үзэж байгаа. Тиймээс бизнес эрхлэгчид, иргэд, аж ахуйн нэгжийг энэ саналыг дэмжиж ажиллахыг уриалж байна” гэлээ.

Б.Пүрэвдорж: Эдийн засгийн хямралтай энэ үед ААН-үүдийг хүнд байдалд оруулж байгаа НӨАТ-ын татварыг 5 хувиар бууруулах ёстой 

Хэвлэлийн хурлын үеэр УИХ-ын гишүүн Б.Пүрэвдорж НӨАТ-ын татварыг бууруулах хуулийн төслийг яаралтай хэлэлцэх ёстой гэв. Тэрбээр,

“Өнөөдөр Короновирусын халдвараас болж дэлхий дахинд эдийн засгийн нилээн том хямрал бий болж байна. Үүний улмаас Монгол улсын нийт ААН-үүдийн 70 хувь эдийн засгийн эрсдэлд ороод байна. Эндээс сэргийлэх арга хэмжээг Засгийн газар, ялангуяа Ардчилсан намын зөвлөлөөс гаргаж буй саналтай уялдуулан зөв арга хэмжээ авах юм бол илүү амжилтанд хүрэх боломж байгаа. Энэ хүрээнд хийх ёстой хамгийн чухал арга хэмжээний нэг бол НӨАТ-ын татварыг багасгах ажлыг маш яаралтай хийх шаардлагатай байна.

НӨАТ-ын татварыг 5 хувьд бууруулах хуулийн төслийг өргөн барьсан байгаа. Нийт ААН-үүд борлуулалтын орлогод тавьдаг НӨАТ-ын татвараас болж эдийн засгийн асуудалд орж байна. Өөрөөр хэлбэл НӨАТ-ын татвар нь эдийн засгийн хямралтай энэ үед ААН-үүдийг хүнд байдалд оруулж байна. Тийм учраас УИХ дарга Г.Занданшатар НӨАТ-ын татварыг бууруулж, 5 хувь болгох хуулийн төслийг хаврын чуулганаар яаралтай хэлэлцэх ёстой гэсэн шаардлагыг тавьж байна” гэв.

Бизнес эрхлэгчид болон эдийн засагчдын саналыг тусгаж боловсруулсан уг тогтоолын төслийн хураангуйг бүрэн эхээр нь хүргэж байна.

ТОГТООЛЫН ТӨСЛИЙН АРГА ХЭМЖЭЭНИЙ ЖАГСААЛТ

Нийт 5 багц 38 арга хэмжээ

Нэг. Монгол Улсын 2020 оны төсөвт тодотгол хийх

1.1.Төсвийн хийсвэр орлогыг нягтлах, гамшгийн үеийн үзүүлэлтүүдээр дахин шинэчлэн тооцоолж, төсвийг бодитой, алдагдалгүй болгох;

1.2. Бизнесийн зээл олголт, дахин санхүүжилт хийх боломжоор хангах зорилгоор улсын төсөвт хөрөнгө оруулалт хэлбэрээр тусгагдсан чухал шаардлагагүй хөрөнгө оруулалтыг тэвчиж, банкны системийн 3 хувьтай тэнцэх хэмжээний зээлийн шугамын эрхийг банкуудад нээж өгөх,

1.3. Төсвөөс Хөдөлмөр эрхлэлтийг дэмжих сан болон нийгмийн даатгалын сангийн ажилгүйдлийн тэтгэмж олгох асуудлыг санхүүжүүлж Короновирусын гамшгаас үүдэлтэй ажилгүй болсон иргэдэд гамшгийн хор хөнөөл арилах хүртэл хөдөлмөрийн хөлсний доод хэмжээг 3 сараар тооцож нийт 1.260.000 төгрөгийг ажилгүйдлийн тэтгэмж авах хуулийн хугацаа дууссан өдрөөс эхэлж олгох,

1.4.Монгол Улсын 2020 оны төсвийн тухай хуульд заасан дараахи урсгал зардлыг бууруулах. Үүнд:

1.4.1.төрийн болон орон нутгийн өмчийн хөрөнгөөр бараа, ажил, үйлчилгээ худалдан авах зардал;

1.4.2.төрийн байгууллага, албан тушаалтны том оврын автомашин, утас, томилолт, баяр ёслол, хурал, уулзалт, зөвлөгөөн болон хангамжийн бусад зардал;

4 арга хэмжээ

Хоёр.Мөнгөний бодлогыг төсвийн бодлоготой уялдуулах

2.1.Монголбанк бодлогын хүүгээ бууруулж, зах зээлд гаргах зээлийн хэмжээг нэмэгдүүлэх, арилжааны банкны мөрддөг зарим журмуудыг хугацаатайгаар өөрчлөх,

2.2.Короновирусын гамшгаас үүдэлтэй эдийн засгийн хүндрэлийг даван туулах бодлогын хүрээнд 2021-2022 онд төлөх Засгийн газрын гадаад, дотоод зээл, бондын төлбөрүүдийг дахин санхүүжүүлэх арга хэмжээ авах.

2.3 Арилжааны банкуудын зүгээс аж ахуйн нэгжүүдэд олгосон зээлийн бүтцийн өөрчлөлт хийх, зээлийн хуваарийг шинэчлэхэд Монголбанкнаас зохих бодлого чиглэл гаргах,

2.4. Төв банкинд Засгийн газрын бондыг арилжаалж, тусгайлсан дэглэмээр шаардлагатай санхүүгийн зузаатгалыг арилжааны банкуудад хийж, зээлийн шаардлагыг бууруулах эрх олгох.

2.5. Бодит эдийн засаг, хувийн секторын чадавхи, бизнесийн орчны орон зайг хамгаалах зорилгын хүрээнд Төв банк тэднийг санхүүгийн зуучлалын хямд, үр дүнтэй арга хэрэгслээр дэмжих бодлого хэрэгжүүлнэ. Банкуудаар дамжуулж, хямралд хамгийн их өртөж байгаа эдийн салбаруудыг дэмжих,

5 арга хэмжээ

Гурав.Аж ахуйн нэгжээ дэмжих, ажлын байрыг хадгалах

3.1.Ажлын байрыг хэвээр хадгалсан аж ахуйн нэгжүүдэд Хөгжлийн банк болон Төрийн банкаар дамжуулан жилийн 3 хувийн хүүтэй санхүүжилт олгох;

3.2. Өмнөх 2 жил татвар төлсөн татвар төлсөн дүнгийн дунджаар Засгийн газраас уул уурхайн бус Аж ахуй нэгжүүдэд зээлийн баталгаа гаргаж өгөх, Засгийн газрын баталгааг Батлан даалтын сангийн санхүүгийн эрсдэл даах чадвар, сангийн хөрөнгийн хэмжээг нэмэгдүүлэх замаар хэрэгжүүлж болох ба Зээлийн батлан даалтын сангийн тухай хуульд өөрчлөлт оруулах,

3.3.Авлага үүссэн аж ахуй нэгж, байгууллагын авлагыг худалдан авах /факторинг хийх/, санхүүжилт олгох сан байгуулах, хеджингийн арга хэрэгслийг Монголбанкны дэмжлэгтэйгээр ашиглах;

3.4.Түрээсийн орон сууцны цогц хөтөлбөрийг хэрэгжүүлэх, үүний хүрээнд уг хөтөлбөрт хамрагдсан барилгын компаниудын зээлийн эргэн төлөлтийг хойшлуулах, хүү, алдангийг бууруулахад чиглэсэн эх үүсвэрийг арилжааны банкуудад олгох;

3.5.Аж ахуйн нэгжүүдийг Нийгмийн даатгалын шимтгэл төлөх үүргээс бүрэн чөлөөлөх;

3.6.Аж ахуй нэгжүүдийн татварын үүргийн зөрчилтэй холбогдуулан битүүмжилсэн дансыг нэн даруй нээх, мөнгөн хөрөнгийг эргэлтэд оруулах, үүссэн татварын өр төлбөрийг төлөх хугацааг хямралаас гарах, бизнесийг нөхөн сэргээх хугацаатай уялдуулан тогтоох;

3.7.Аж ахуйн нэгжүүдийн үйл ажиллагааг хязгаарласан мэргэжлийн хяналтын байгууллага болон холбогдох бусад төрийн байгууллагын шийдвэрийг хуульчлан зохицуулж түдгэлзүүлэх;

3.8.Татварын өр үүсгэсэн аж ахуй нэгжүүдэд татварын алданги, хүү, торгууль ногдуулахыг хориглох;

3.9. Жижиг дунд үйлдвэрийн импортын түүхий эд, материалын гаалийн ба нэмэгдсэн өртгийн албан татварыг 2020 он дуустал тэглэх

3.10. Зарим нэр төрлийн чухал шаардлагатай эмийг Монгол Улсын эмийн бүртгэлд түргэвчилсэн байдлаар бүртгэх асуудлыг зохицуулах, гадаадаас импортоор авдаг шаардлагатай байгаа эм, хэрэгсэл, лабораторийн урвалж, тоног төхөөрөмжийн импортын гаалийн болон НӨАТ-аас тодорхой хугацаанд чөлөөлөх,

3.11. Хүнсний бөөний худалдаа эрхлэгч аж ахуй нэгж, иргэдэд 2 жилийн хугацаатай бага хүүтэй эргэлтийн хөрөнгийн санхүүжилтийг олгох

3.12. Газрын төлбөр, үл хөдлөх хөрөнгийн татварыг тодорхой хугацаанд бууруулах, чөлөөлөх,

12 арга хэмжээ

Дөрөв. Иргэнээ дэмжих, ажилгүйдэл ядуурлаас хамгаалах

4.1.Ипотекийн зээл /хүү болон үндсэн төлбөр/-ийг 12 сарын хугацаанд царцааж, мөнхүү хугацаагаар зээлийн эргэн төлөлтийг сунгах;

4.2.Хөдөлмөр эрхлэгчдийн цалинг баталгаажуулах, ажлын байрны хөдөлгөөн, чөлөөлөлтийг хязгаарлах;

4.3.Нийгмийн даатгалын шимтгэл болон Хувь хүний орлогын албан татвар төлөх үүргээс бүрэн чөлөөлөх;

4.4.Дотоодын дээд сургуулийн бүх оюутны 2020-2021 оны сургалтын төлбөрийг чөлөөлж, холбогдох санхүүжилтийн механизмыг бий болгох;

4.5.Малчдын зээлийн хүү, төлбөрийг хойшлуулж, мал аж ахуйн бүтээгдэхүүнд зориулсан шинэ зээлийн эх үүсвэрийг нэмэгдүүлэх;

4.6. Тариаланчдын зээлийн хүү, төлбөрийг хойшлуулж, газар тариалангийн бүтээгдэхүүнд зориулсан шинэ зээлийн эх үүсвэрийг нэмэгдүүлэх,

4.7. Төрийн орон сууцны корпорацийн Түрээсийн орон сууцны хөтөлбөрт хамрагдаж түрээсийн байранд амьдарч байгаа иргэд, айл өрхийн түрээсийн төлбөрийг 3 сараар чөлөөлөх,

4.8. 0-18 хүртэлх насны хүүхдэд сар бүр олгодог 20 мянган төгрөг дээр 10 мянган төгрөг нэмж, 6 сарын хугацаатай олгох.

8 арга хэмжээ

Тав.Бусад

5.1.Короновирустэй тэмцэх чиглэлийн хүрээнд гарсан төрийн байгууллага, албан тушаалтны аливаа шийдвэрийг тухайн байгууллагын албан ёсны цахим хуудсандаа тусгайлсан цонх үүсгэн байршуулж, олон нийтэд эргэлзээгүй, үнэн зөв мэдээлэл авах нөхцөлийг бүрдүүлэх;

5.2.Төрийн байгууллагууд иргэдэд үзүүлдэг үйлчилгээ тус бүрийнхээ бүрдүүлэх материал, төлбөр хураамж, шийдвэрлэх /хариу өгөх/ хугацаа, шат дамжлага, материал хүлээн авахаас татгалзах буюу материалыг буцаах үндэслэл, үйлчилгээний цагийн хуваарь болон бусад нөхцөл, шаардлагын талаарх бүх төрлийн мэдээллийг цогц, системтэйгээр цахим хуудсандаа байршуулж, утсаар тухай бүр лавлагаа, мэдээлэл өгөх, зайнаас үзүүлж болох үйлчилгээг тодорхойлон үр дүнтэй, иргэдэд төвөггүй, хүртээмжтэй байхаар зохион байгуулж нэвтрүүлнэ.

5.3.Короновирусын дэгдэлтээс урьдчилан сэргийлэх, эмзэг байдлыг бууруулах, эрсдэлийг таслан зогсоох чиглэлд авч хэрэгжүүлэх арга хэмжээний зардлын төсвийг Засгийн газар тусгайлан төлөвлөж, Улсын Их Хурлаар батлуулах;

5.4.Короновирусын халдвар авсан буюу сэжигтэй нөхцөлд байгаа иргэдийг байрлуулсан эмчилгээний болон хамгаалалтын бүсэд үүрэг гүйцэтгэж буй эмч, эмнэлэг, онцгой байдал, цагдаагийн албан хаагчид, холбогдох бусад ажилтанд энгийн үед олгодог үндсэн цалинг нь 3 дахин нэмэгдүүлсэнтэй тэнцэх хэмжээний цалин, хөлс, урамшуулал олгох

5.5.Короновирусын дэгдэлтээс урьдчилан сэргийлэх, эмзэг байдлыг бууруулах, эрсдэлийг таслан зогсоох чиглэлийн хүрээнд өндөржүүлсэн бэлэн байдлын онцгой нөхцөлд,тусгай дэглэмээр үүрэг гүйцэтгэж байгаа бусад төрийн албан хаагчдад энгийн үед олгодог үндсэн цалинг нь 2 дахин нэмэгдүүлсэнтэй тэнцэх хэмжээний цалин, хөлс, урамшуулал олгох;

5.6.Короновирусын дэгдэлтээс урьдчилан сэргийлэх зорилгоор иргэдийн өдөр тутмын хэрэгцээг хангахад чиглэсэн үйлчилгээ эрхлэгч аж ахуйн нэгжүүдэд үйлчилгээний түр горим, стандартыг тогтоон, хэрэгжүүлэх;

5.7.Короновирусын дэгдэлтээс урьдчилан сэргийлэх, эмзэг байдлыг бууруулах, эрсдэлийг таслан зогсоох чиглэлийн бодлого, үйл ажиллагааны хэрэгжилт, нийгмийн дэг журам, сахилга, хариуцлагын байдалд тавих хяналтыг сайжруулах, идэвхижүүлэх зорилгоор энэ төрлийн үйл ажиллагаанд иргэдийг татан оролцуулах;

5.8.Короновирусын дэгдэлтээс урьдчилан сэргийлэх, эмзэг байдлыг бууруулах, эрсдэлийг таслан зогсоох чиглэлийн хүрээнд Засгийн газар Монгол Улсаас гадаад улсад суугаа элчин сайдын яам, дипомат төлөөлөлгчийн газрын чиг үүрэг, бүрэлдэхүүнд хугацаатай өөрчлөлт оруулж, тэдгээрээр дамжуулан гадаад улс оронд суугаа иргэддээ санхүү, эрүүл мэндийн болон шаардлагатай бусад туслалцаа, үйлчилгээг үзүүлэх;

5.9.Короновирусын халдвар авсан өвчтөнийг эмчлэх зорилгоор Засгийн газар Бүгд Найрамдах Хятад Ард Улс болон бусад улс орноос эмч, эмнэлгийн ажилтан урих, Монгол Улсад нэвтрүүлэх, тусгай үүргийн онгоцоор авч ирэх.
9 арга хэмжээ

 

 

Ангилал


Twitter


Facebook